الشاعر : سالم بن جخير

[عزي لحالي]

بسم الله الرحمن الرحيم




السلام عليكم ورحمة الله وبركاته


http://farm1.static.flickr.com/218/467118744_f5be42ea11_m.jpg



الشاعر : سالم بن جخير

,
,
,

قصيدة مرثية الشيخ زايد للشاعر سالم بن جخير (http://www.alnadawi.com/poems/members.php?action=profile&id=سالم بن جخير)


للشعر حزه واشهد ان حزته جات *** احس في راسي رحى مستديـره

مابين نبرة حزن ودموع وآهـات *** الوجه شاحب والنواظر ضريـره

خلوني ابكي وانثر الدمع بسكات *** ما للحزن غير الدموع الغزيـره

واكتب بدمي واقهر الحزن ببيات *** واسل سيف الشعر واحذف جفيره

وابث شعري مثل بـث القنـوات *** هيا سمعوني يالجمـوع الغفيـره

لامات زايد ذكره الحي مامـات *** بقلوب خلق الله فـي كـل ديـره

بقلوبنا يبقى على طول الاوقـات *** لاغاب عنا تذكـره كـل سيـره

شيخ المراجل والوفا والمـروات *** زودٍ على طيبه محكّـم ضميـره

يعطي لوجه الله رب السمـوات *** يمناه من كثـر العطايـا شهيـره

كل المزايا الطيبـه فيـه بالـذات *** ماكن فيه انسان فالأرض غيـره

عز وكرم واخلاق هيبه ووقفـات *** واشياء ماتحصـى لأنهـا كثيـره

انشهد انه فـوق روس المنيفـات *** دايم على درب المعالي مسيـره

اقولها وفعولـه شهـود واثبـات *** وماباقـي الا الكلمتيـن الاخيـره

ترى العزا ماهو لشعب الامارات *** تكفون عزو كل شعب الجزيـره

[عزي لحالي]

قصيدة ياعوق يابعض الرجاجيل ياعوق



الصبر زين وكل مطـرود ملحـوق *** دام النجـوم العالـيـات بسمـاهـا
ياهاجسي برفـوق لاقلـت برفـوق *** ماهيـب لحيـة علهـا ياعسـاهـا
ولاهيب لحية وين غيبـت ياشـوق *** ولاهيب لحية مت انا مـن غلاهـا
هجس القصيد يتوق صوبي وانا توق *** بسـم الله الرحمـن فـي مبتداهـا
رعادهـا رعـاد وبروقهـا بـروق *** لامن حداها الشاعر اللـي حداهـا
كان القصيده بنـت عـزٍ وغرنـوق *** حلّيبـهـا حلّيـبـهـا لعنـبـاهـا
لاجاتنـي حطيتهـا داخـل المـوق *** والله يحييـهـا ويحـيـي نبـاهـا
لها علي حقوق وانـا لـي حقـوق *** ولاّ بلاش امـن القصيـد وبلاهـا
مانيب اعدلها علـى كـل طـاروق *** اليـن اجنّنهـا وابـيـح خفـاهـا
الفكر شاشة عرض والقلب صندوق *** يعني علـى ماقيـل بيـر وغطاهـا
ياهل الوثايق جاكم العلـم موثـوق *** نصيحـةٍ ياخـذ بهـا مـن قراهـا
ترى النصيحه كان في ساحة السوق *** معروف بايعها علـى مـن شراهـا
لو كل روضٍ به خزامى ورقـروق *** محدٍ شكـى الدنيـا ودورة رحاهـا
والمنخنق لا قـال مانيـب مخنـوق *** تشهد عليـه العيـن لاهـل ماهـا
والحر يخدم دام له وكـر وسبـوق *** ولا الحديـا عيبهـا فـي حـدهـا
والرجل فعل وطيب موقف ومنطوق *** والمفلس اللـي مايحصـل حداهـا
لاتبدي اسرارك على كـل مخلـوق *** الناس ماتدري وش اللـي وراهـا
عليك باللـي طلعهـم دايـمً فـوق *** اللي عـن الـزلات تكـرم لحاهـا
خلك عسر وارقى على كل شاهوق *** وسلم على اللـي لارقاهـا رقاهـا
واحذر تخاوي من تجرد عن الذوق *** اللـي بـزلات اللـسـان يتبـاهـا
تلقاه بين الكذب والـزور والبـوق *** وباقـي علومـه كلهـا ماخزاهـا
ياعوق يابعض الرجاجيـل ياعـوق *** اللـي تثـوّر بندقـه فـي اخباهـا

[عزي لحالي]

مـرثــيــه فـــــي خـــالـــي


سعـد بـن سالـم بـن قـطـام العرجـانـي


الله يرحـمـه ويسكـنـه فسـيـح جنـاتـه


يقولون وجهك وش علامـه مـن الارهـاق ؟ *** وانا اقـول ماهـي لحيـة الوجـه وارهاقـه
علي الطلاق اني من الحزن صـدري ضـاق *** وعينـي علـى خالـي مـن الدمـع دفـاقـه
ويقولون مـن بعـد التجمـع يصيـر افـراق *** وانا اقـول بعـض النـاس يوجعنـي افراقـه
فلا شـك كـل الخلـق فـي دبـرة الخـلاّق *** ولاحــق للمخـلـوق عصـيـان خـلاقـه
عسى الله يرحـم راعـي الخُلـق والاخـلاق *** نشـا ثـم رحـل واخلاقـه اخلاقـه اخلاقـه
ايـا خالـي اللـي بالوفـا دايـمـا سـبـاق *** يمينـه لـدرب الطيـب خـطـلا وسبـاقـه
وايـا خالـي اللـي كـل مانِشْفـت الاريـاق *** شجـاعٍ يحـب المـوت ويعْشقـه عشـاقـه
رحل والعزى انـه ساكـنٍٍ داخـل الاعمـاق *** مكانـه مكانـه داخـل القـلـب واعمـاقـه
اعزي على ( عويضه ) واعزي على ( خفّاق ) *** واعـزي علـيـه الـعـود لازادو احـراقـه
واعـزّي عليـه الخيـل والهيـل والـبّـراق *** واعـزّي عليـه الليـل والصبـح واشـراقـه
واعـزّي عليـه السيـف والرمـح والاوراق *** واعـزّي عليـه الحبـر لاعـانـق اوراقــه
فـــيالله يالمـعـبـود يـاكـافـل الارزاق *** عليـك الرجـا ياكافـل العـبـد وارزاقــه
عسـاه الجنـان البـارده واطـول الاعـنـاق *** وعسى المزن تنبـت فـوق قبـره ميـة باقـه
وعسـى الله يصبرنـا لـو الصبـر ماينطـاق *** وعسـى الله يجعـل للصبـر عندنـا طـاقـه

[عزي لحالي]

قصيدة ليت مالي كثر مال الوليد ابن طلال..؟



يالله التوفيق والستر والـرزق الحـلال *** والتمسـك بالهدايـه وبالـراي الحكيـم

وبالجناب السمح والصدق وعلوم الرجال *** وخوة الطيب وممشى الطريق المستقيـم

كل هذي كنها الكيف من صفر الـدلال *** وكنها البـراق لا لااح فالليـل العتيـم

لاشموخ الا شموخٍ مثـل شـم الجبـال *** ولا نديـم الا نديـمٍ مهـوب اي نديـم

من تنصى طيب الراس يبشر بالجـزال *** ماله الا اللي يرد البرى عنـد الخصيـم

ومن تنصى بارد الراس يبشر بالهـزال *** راح له حاله سقيم ورجع حالـه سقيـم

احدٍ لاجيت صوبه وقال الشـي طـال *** واحدٍ لاجيت صوبه يزيد الضيم ضيـم

ليت مالي كثر مال الوليد ابـن طـلال *** كان عيشـت الفقـارى بجنـات النعيـم

صح انا شاعر والى جيب للشاعر مجال *** قالوا ان الشاعر يهيـم فالـوادي يهيـم

افتخر فالشطـر الاول وفالثانـي مثـال *** والعقل ياهل العقل قيل فالجسم السليـم

غير انا مانيب طيب ولا ذالحـال حـال *** ابتدابي جرح زودٍ على الجـرح القديـم

عزتـي للـي سواتـي بهمـه لايـزال *** والله اللي يعلم الحـال والله بـي عليـم

كل ماوجهت واحـد يوجهلـي سـوال *** وش بلا حالك ياسالم مسوي لك رجيـم

ناس فالدنيا يعيشون في بـرد وظِـلال *** وناس فالدنيا ولكـن يصالـون الجحيـم

يالله اني مستعيذك من ادروب الظـلال *** احمني يالله مـن كـل شيطـانٍ رجيـم

ذنبي اني صرت طيب وطيبي راس مال *** لين صرت اشوف نفسي على الدنيا يتيم

كثر حكي الناس عني وانا ياهـم الا ل *** اتغيشـم واتغيشـم وان مانـي غشيـم

يااولو الالباب وان كان جابولي مجـال *** يااولو الالباب فل يتقـوا شـر الحليـم

يالهجوس اللي نويتي تشديـن الرحـال *** وين قولي وين والشعر في صدري مقيم

والله اني كل ماضقـت ذبيـت الطـوال *** ماتسمع في عبـادي ولا عبـد الكريـم

والقصيد احيان ياتيك من وحي الخيـال *** غير انا صادق ليـا قلـت والله العظيـم

وانت ياللي يوم جيتك وانا كلي وصـال *** والله انـه مايـرد الكريـم الا الئـيـم

انتبهلـي واستمعلـي و سجـل مايقـال *** واعرف ان الجو صافي ولا فالجو غيم

اعتبرها نصـح والفـال يتـلاه العقـال *** وكلمة العاقل ليا جات جاتـك فالصميـم

الوفا والطيب والعز من طبـع الرجـال *** والتغلي والغلا والدلـع طبـع الحريـم

[عزي لحالي]

قصيدة لبى العرب للشاعر


الليله اللـي بدايتهـا قصيـد وطـرب *** تكاشـف ابروقهـا لاحنّـت ارعودهـا

هيهات هيهات واللي مايطـول العنـب *** يشره على شجر ِته لو طال عنقودهـا

والجادل اللي تفاخر بالحسب والنسـب *** وشلون ماتفتخـر لاعـدّت اجدودهـا

كنت احسِب الدم ياصل دونها للركـب *** إليـن ساقتنـي الاقــدار لحـدودهـا

امهايطيـه ولاتهتـم فطـلـق شـنـب *** لسترسلت فالحكـي ياحـي مارودهـا

من صوتها العذب تطعني بليّـا سبـب *** وانـا ا تحمّـل خناجرهـا وبارودهـا

الا على طاري الطعنات لبّـى الهـدب *** لبيـه لبيـه لامـن سلهمـت سودهـا

قالت عشا قلت مستعجل وقالت شبـب *** هي فاهمتني وانـا فاهـم لمقصودهـا

دخلت في ربعـةٍ فيهـا ادلال ومشـب *** وصبّت من الدله اللـي فايـعٍ عودهـا

(لبى العرب) ياحليب الذود لبى العرب *** من يوم قالـت تعـال وبهّلـت ذودهـا

انا اشهد انها على ماقيل عـز الطلـب *** واحتـرت مابيـن حِقتهـا ومفرودهـا

لاجيت اوصّف وش اوصّف ويا للعجب *** الليـل فجعودهـا والصبـح فخدودهـا

والله ماكن فيهـا اعظـام ولا عَصَـب *** عـزاه لامـن تثنّـت وانثنـى عودهـا

وانا انتحاري على الفطره واحب النشب *** والبنت من جودها حصّلـت ماجودهـا

لمحـت فعيونهـا كـلام كلّـه عتـب *** سئلتهـا ليـش لكـن كـان مردودهـا

قالت سلمنـا ولكِنهـا سلامـة عطـب *** والله يستـر مـن العالـم ومنقـودهـا

ليله وعدت ولادري كيف طاح الحطب *** ان باحت اسدودها ماباحـت اسدودهـا

والله لو قيل عدها واخذ وزنـك ذهـب *** والله مـاعـودهـا والله مـاعـودهـا

[عزي لحالي]

قصيدة مرثية الملك فهد



اعوذ بالرحمـن مـن كـل شيطـان *** ومن الغدر ومـن الحسـد والعمايـل
والى ابتدى ليل القصايـد والالحـان *** بديـت واشفيـت النفـوس الغلايـل
وانا ماشوش الا على صهلة حصـان *** وعلى عـزاوي ناقضـات الجدايـل
مانيب اخوض الحرب في كل ميـدان *** اليـن يشعفنـي صهيـل الاصـايـل
الله خلق لي فكـر وعيـون ولسـان *** اقـدر امـيـز واتكـلـم واخـايـل
نيابـةٍ عـن يـام والشيـخ راكــان *** وقفت امثـل لـي شعـوب وقبايـل
وذبيت فـي راس الطويلـة مسيـان *** والحيل مامن حيـل والدمـع سايـل
ومن البكا سالـت مـلازم ووديـان *** وحتى الطويله مـن دموعـي تهايـل
وبكوا على صوتي شغاميـم نجـران *** وبكوا على صوتـي شغاميـم حايـل
عليـك ياعـز العروبـه اكحـيـلان *** عز العرب رمـز الوفـا والجمايـل
ملـك ومتواضـع وللعـز عـنـوان *** حذفك بعيـد وشبـر يمنـاك طايـل
اسمك الحاله يرجـح بكـل ميـزان *** وذكرك مابين الناس صايـل وجايـل
من لا انجبت مثلك على مر الازمـان *** احسن لها تبقى علـى طـول حايـل
ومن لا نهج نهجك على سنان وعنان *** ماظنتـي يدعـى صبـي الصمايـل
تركتنا في عـز فـي امـن وامـان *** وانعام ماتحصـى وخيـر وفضايـل
موتك فجيعه حلـت بكـل الاوطـان *** مـن هولهـا شفنـا نجـوم القوايـل
يومٍ بـدى مظلـم تباشيـره احـزان *** تقول فـي يـوم الحشـر والهوايـل
لكن عزانا في هـل العـز والشـان *** اخوان نـوره مقُـدم اعيـال وايـل
العزوه اللي لكتسـى الجـو دخـان *** افعالهـم تلغـي جمـيـع الفعـايـل
نرسل عزانا صوب ذربيـن الايمـان *** ونجـدد البيعـه بـكـل الوسـايـل
ونرفـع يدينـا كلنـا سـر واعـلان *** وندعي لهـم بالفـرض والا النفايـل
على العهد باقيـن انصـار واعـوان *** ماخانـوا العشـره اعيـال الحمايـل
ماعندنـا بايـر وكـاذب وخــوان *** نصدق مثل صادق حقـوق المخايـل
لعيون (عبد الله) ولعيـون (سلطـان) *** ناقف ونـردع كـل غـازي وعايـل
هـذي عوايدنـا مقـلـع وخـبـلان *** والـى نوينـا يعتـدل كـل مـايـل
ناتي كـذا خبـلان صقهـان عميـان *** ونـذود دون معوبسـات الشمـايـل
حنا نهـار الضيـق رئاسـة اركـان *** حنـا الكتايـب واللـوا والفصـايـل
حنـا لقادتنـا مـحـازم وفـرسـان *** ضد الغدر ضـد الجهـل والتحايـل
من عهدنـا الاول الـى عهدنـا الان *** وحنا علـى نهـج الجـدود الاوايـل
والحكم لال سعود والضـد خسـران *** وعندي على قولـي شهـود ودلايـل
ومن لا اعتبر يقلط على السيف شامان *** وماله عن المـوت المحقـق بدايـل
اقولهـا مـن قلـب يغشـاه الايمـان *** واعيدها لاقيل ويـش انـت قايـل ؟
وان ودع بليهـان يـاتـي بليـهـان *** وحنا بامـن وامـان والشـك زايـل

[عزي لحالي]

قصيدة الفكسار


(vxr)



ابعدي ياضيقة الصدر عنـي واغربـي *** عن محيا سمح لاضاق للمولـى سجـد

لاذكرت الله من الخوف عزّي لركِبـي *** كيف اكابر والله الواحد الفـرد الصمـد

لنّي ادري تالي العمر وشهـو مكسبـي *** ياتجـرّع مـر ولا اتـلـذذ بالشّـهـد

ياهجوس الشعر غني بصوتي والعبـي *** بين ديرة جابر الخيـر والعاهـل فهـد

للعرب مذهب وانا فالشعر لي مذهبـي *** وكل واحد شيخ روحه نزل ولاّ صعـد

دامني من بحر الاشعار عارف مشربي *** سجلونـي للجزالـه وكيـل ٍ معتـمـد

ويش عاد اقول وانـا محـدّد منصبـي *** مابقى الا لمحة البـرق لاحـن الرّعـد

راكب اللي لستوى الخط مايدبي دبـي *** منـوة السـواق فالقـار ولاّ فالجـلـد

اسمـه ال(vxr) ولاّ عريـب المنسبـي *** يـوم غيـره لاذكرنـاه تِكمالـة عـدد

جابه الساير يغيض الفطيمي فـي دبـي *** كاتـب ٍ فـي دفتـره كافلينـه لـلابـد

ان نطحته قلـت لبيـه ياوجـه الظبـي *** وان قفيته قلـت حـر ٍ يبشّـر بالهـدد

طلتـه طلـة حليمـه وريمـا مكتبـي *** ماعلي امن الطبايع علي امـن الجسـد

كن صوت محركاتـه تـردّد ياصبـي *** الله اللي عزنـا ويـن وابشـر بالسعـد

صانعه ماقال ضيّعت جِهـدي واتعبـي *** لنّه اصلاً سهم رابـح ومكسـب للبلـد

صانعه ملعون كوثر وكافـر واجنبـي *** مايفكّـر فالقبـر والنصايـب واللّحـد

لو اقول انه غبي كيف يصنع ذا غبي؟؟ *** مااعتقد ان الغبا مـن صفاتـه مااعتقـد

ان تكلّم جات الاحرف ذليلـه وتحبـي *** من كلامه كن عنـده مشاكـل فالغـدد

الوكاد انه تفـوّق علـى كـل أعربـي *** لاتعهـد لـك بحاجـه تمسّـك بالعهـد

ولا حنّا والنعم بـس فـي كلمـة ابـي *** ابي هذي وابي هذي وابي هـذي بعـد

شغلنا الشاغل لا ذعذع نسيم المغربـي *** إلبس عقالك وحافظ على الغتـره هـدد

نفتخر ونقول حنـا علـى نهـج النبـي *** ونتفاخـر بالقصايـد ولا فينـا جـهـد

الولد لامن سألتـه عريـض المنكبـي *** قال انا شوق الغناديـر مَنّـور وشهـد

اعـرف mbc فيهـا رزان المغربـي *** واعرف اللمبي بطولتك يامحمـد سعـد

ولا سئلت العود غنى ياكنزي وذهبـي *** التجـاره عندنـا فالنعـيـم وفالنّـجـد

ويوم جات قريش تبغي تخون اليثربـي *** وين راح العود ولاّ الولد وين الولد؟؟!!

الله اكبر يازمان ٍ سبـى حالـي سبـي *** الوعد مدري متى ويـن لكـن الوعـد

كان عمري طال والله لحقّـق مطلبـي *** وعقّب اللـي فالشدايـد يمينـه ترتعـد

والهنوف اللي تحاكت وقالت وش تبـي *** قلت انا قالت نعم انت وش عندك بعـد

دون مااشعر جات يمناي من فوق اشنبي *** وابتسمت وقلت ياجعـل مافيهـا بـرد

ان طفت نار الغلا ماطفت نار حطبـي *** والدليل اني باصرح ولا عنـدي فحـد

دامني مرتاح واشوف زول امي وابـي *** جعل عيـن ٍماتبينـي يطاولهـا الرّمـد

[عزي لحالي]

قصيدة مجنون خلقه


عزاه ليت الصبر يشرى والله انـي لشتريـه *** وياطي حالي من غرابيـل الزمـان وطيتـه

اثر الهوى يخلي الرجال ينسى امـه وابيـه *** الا بـري حالـه وعزيلـه وممحـق نيتـه

يصد عن بعض الوجيه ويشكي لبعض الوجيه *** لاهل دمعـه عنـد خلـق الله وربـي بيتـه

ياليتهم يـدرون باللـي فـي فـوادي كلّبيـه *** كان اعذروني واتركو قلبـي علـى سجيتـه

(مجنون خلقه ) وابتلاني واحدٍ حسبي عليـه *** جنيتـي مـن يـوم شفتـه عانقـت جنيتـه

شرع بقلبي من يسار وقـام يسحـب مايليـه *** لرتحت من شلفاه شفت الموت مـن جنبيتـه

الله مسخّرني كذا والقلب فـي راحـة يديـه *** قلبي معه بشهـود ومعـرّف علـى ملكيّتـه

ماغيراراقـب طلعتـه واقـول يالله تهديـه *** عساه ياقـع فـي محابيـل الغـرام وخيتـه

امشي معه كني سفيه وارجع معه كني سفيه *** الله معنينـي معـه مــن بيـتـه لكليّـتـه

لاشفت زوله من بعيد وكل شبحي لـد فيـه *** كنه يقول انـي بامـوت ولا عَبـر محميتـه

انشهد انـه فالحـلا والملـح مامثلـه شبيـه *** كن الحلا في معصمه والملـح فـي كفيّتـه

ابيه مـن قلبـي ابيـه وكـل مافينـي يبيـه *** لخطيت من حسناه راضي لو تجينـي سيتـه

لو المطالب بالتمنـي دون كيـف ودون ليـه *** كـم واحـدٍ لامـن طلـب تحققـت امنيتـه

ياليـت لـه اخٍ صغيّـر واتعذربـه واجيـه *** لاقال وش عندك هنـا طلعـت لـه عيديتـه

والله لعزّه وان تعثر قلـت بسـم الله عليـه *** ماهو لجل عين الصبي لجل عيـون اخيّتـه

ذبحت نفسي من غـلاه الله يرحـم والديـه *** واللي ذبح نفسه بنفسـه كيـف تِدفـع ديّتـه

[عزي لحالي]

قصيدة نسكر ونفقد؟؟


الاهداء الى


صاحب السمو الملكي الامير تركي بن محمد بن فهد بن عبدالعزيز ال سعود حفظه الله






الى امطرت مزنة القيفان عقب الجفاف= اموت مع كل مطلع بيت واحيابها


واعيش حالة عزا واعيش حالة زفاف= وابدابها واستخير شوي وابدابها


لكن علي الحرام ان القلم له رعاف= إلين تروى رياض الطرس واشعابها


وقافٍ مايمدح هل الطالات ماهوب قاف= تموت بعض القصايد داخل كتابها


بعض القصايد تشاف وكنها ماتشاف= وبعض القصايد مواقف عز لصحابها


وانا احترفت القصيد وصرت نجم احتراف= اداعب ابيات شعري واتسلابها


سلام ياسيف شعبك فالسنين العجاف= لاكشرت دورة الايام بنيابها


لو للمراجل مجله صرت فوق الغلاف= المرجله كلها عديت مرقابها


ابصم لك بعشر واوقع على الاعتراف= واكتب جزيل القصايد واتغنابها


ياشوق بنت المراجل والستر والعفاف= ماشيف منها سوى الكفين واخضابها


اخضابها مثل طعنات السيوف الرهاف= متخالطه بين حمرتها وعنابها


لو تكشف الوجه تدري وش وراى الاكتشاف= تقول شمس الضحى فالارض وش جابها


تستاهلك وانت ذكرك عز واسمك لحاف= ماباقي الا تصيح وتفقد اعصابها


انت الكرم والوفا وانت النوايا النظاف=ثلاثة القاب تزهابك وتزهابها


من كثر ماقلت تركي صاب عقلي خفاف= شاعر يردد حروف اسمك وهذرابها


يكفيك جدك ملك وابيك بالعز ناف= وش عاد اعظم من الاسماء والقابها


مثل مايفخر بنو عبدو مناف بمناف= نفخر بسيرة هل العوجا ونرضابها


فول مطاف العمر الى انتهاء المطاف= والعز ذكره وراياته هم اولابها


ياخوان نوره حمات الدين والانتصاف= الى عتزيتوا( بنوره) بنتعزوابها


الى دعونا ولاة الامر جانا شعاف= كن المنايا هدايا ونتحلابها


حنا جنود الوطن في ساعة الاصتفاف= في ساعةٍ المنايا شرعت بابها


نسكر ونفقد على صوت الزهم والهتاف= والى نوينا ندك البيد بهضابها



عقب صبيٍ الى جات المهمات خاف= اللي لاجات المهمه ماتسموابها


يازمرة الشر والتخريب والانحراف= خيمة هل الشر نقشعها من اطنابها


ياهل الغدر والجهل واهل النفوس الضعاف= قدامكم روس قومٍ تفتل اشنابها


ناطى عليكم مثل وطي الجمل بالخفاف= وفصدوركم كل شلفا تبلغ انصابها


رؤوسكم اينعت وحان وقت القطاف= والسيف الاملح يقص الروس برقابها


تبغون ترويع الامن وزعزعة لإتلاف= بدري مادام البنادق رهن سبابها


المملكه في حمى الله والسيوف الرهاف= تخسون عنها وعن تدنيسة اترابها


الله واكبر سعي والله واكبر طواف= حنا ذرى الدار واهل الدار وادرابها

[عزي لحالي]

قصيدة خبر عاجل

البارحـه فنتظـارك واحسبنـك عـجـل *** واثـرك تلـذذ بتعذيبـي وانـا مستميـت
يعني تغـلا علـي والا غـرور وجهـل *** والا مثـل كـل مـره ياحبيبـي نسـيـت
تخطي علي واتحمل منك مابغـى الزلـل *** ولاقلت لك لاتمادى قلـت لـي مادريـت
من قبل اعرفك وانا فينـي مـواري عقـل *** والحين مالي رفيق الا السهـر والبكيـت
سرقتنـي واعرفـك ماتسـرق الا جمـل *** وسرقتك هاذي خبر عاجل ولـه مانشيـت
لبـى تغليـك يالغالـي ولبـى الخـجـل *** انا اشهد اني معك ياغايتـي رحـت تيـت
لبيـه ياوجهـك السمـح البشـوش القبـل *** في مثل حسنك فـلا سمعـت ولا رأيـت
سبحان ربٍ عطـاك الزيـن عـز وجـل *** في سوق يامرحبا بالزين بعـت وشريـت
حبـك بقلبـي مبنـي لـه بيـوت وفلـل *** وان كان مانته مصدق عدهـا بيـت بيـت
وصلت لقصاي من حبـك وقدنـي ثمـل *** رويت حتى الثمالـه منـك ولا ارتويـت
يالمشتري شوف حبك فـي حنايـا زحـل *** رضيت يالمشتـري والا بعـد مارضيـت
ياويش جاب الزعل ياويش جـاب الزعـل *** تعـال واعلمـك بالسالفـه كيـت كـيـت
ان جيت راعي محل وان غبت راعي محل *** يعني محلـك محلـك غبـت والا لفيـت
اسمع تـرى خيـر ماقـد قيـل قـل ودل *** وان جيتنـي كمبليـت استقبلـك كمبليـت
انا أعترف مااحب اقـول شعـر الغـزل *** لكن غنيـت بيـت وجاتنـي بيـت بيـت

[عزي لحالي]

قصيدة صوت المنابر


يقول من عـدا الجبـال المنيفـه *** عدا وحزنه داخل الصدر ثابـر

يجر صوتـه مانـوى بالنكيفـه *** ويحـاول يكابـر وعيـا يكابـر

والحزن ماكن والنواظـر كفيفـه *** والقلب صابر غير ماهوب صابر

لان الحزن ماهو بكيفـي وكيفـه *** وماكل حزن يجيك ويمر عابـر

الكسر يجبر يالضلـوع النحيفـه *** لكن مال الحزن فالصدر جابـر

وانا وقلبي والسيـوف الرهيفـه *** وبيوت شعري والورق والمحابر

ودموع عيني والرياض المريفـه *** والعز والوقفه وصـوت المنابـر

صار الحزن من بيننا بالنصيفـه *** على فراق اغلا الشيوخ الاكابـر

اشجع شيوخ الارض لاسل سيفه *** واطول شبور الخلق لاجا يشابر

واحن من قلب الوليـف لوليفـه *** وازكى وارق امن الزهر والعنابر

اثبت لنـا ان التواضـع حليفـه *** وان الرجال اهل المواقف مخابر

ابو الكرم وابو النوايـا النظيفـه *** ماشح يوم ان الزمن صار غابر

شال الحمول الكايـده والخفيفـه *** وثابر وصار الشعب كله يثابـر

حتى تجاوزنا الظروف الكليفـه *** ولا بقـى فالـدار للشـك دابـر

عليه كل عيـون شعبـه ذريفـه *** ويبقى الحزن ثابت وماكن وكابر

لو القبر يـدري بمقـدار ضيفـه *** ماشفت خلق الله سوى فالمقابـر

ودي اصـرح والنوايـا شريفـه *** وانا الى صرحت عارف وخابر

والنعم ببن سعود وابـن خليفـه *** لكن جابر ماخلـق مثـل جابـر

[عزي لحالي]

قصيدة طبع الصبايا


والله اني مابديت الهجـر ودروب الخطيـه *** لين هي اللي بدت بالهجر ودروب الخطايـا

جادلٍ تخطي علي وتقول لا تخطـي عليـه *** اشهد انها بالخطا المقصود سوت بي سوايـا

صابرٍ من شان طيبتهـا وضحكتهـا شويـه *** والله اني صابـر ٍ والـرب عالـم بالخفايـا

والله ان كنها توردني على حـوض المنيـه *** لغمزت لي بالعيون ولضحكت لي بالشفايـا

كن بشفاها كلام يقول شـوف النـار حيـه *** وان بغيت الثلج شوف الثلج في ذيك الثنايـا

عيدها لاقلت بعلى الصوت( وينـش يابنيـه) *** كن حرف الشين مكتوبٍ على كـل الزوايـا

يوم قلت الها الحذيه قالـت ابشـر بالعطيـه *** قلت جوزي من عنادك قالت كلي لك عطايا

قلت يعني صادقه قامت تبسـم قالـت ايـه *** قلت وش يثبت كلامك قالـت ورب البرايـا

انك اغلى من مشى في الارض من بد البريه *** وان حبك مسكنه موجود مـن بيـن الحنايـا

قلت طيب ويـش حـدك فالعلـوم الاوليـه *** يوم قلتي لي علـومٍ كلهـا سهـوم ومنايـا

يوم قلتي لي نويت الهجـر والنيـه مطيـه *** يـوم بدلتـي النوايـا يـوم بدلتـي النوايـا

قالت انك تعرف اني بالعمـر تـوي صبيـه *** والدلع دايم تعرفه طبع من (طبـع الصبايـا)

بس انا بطلبك طلبـه انـك اتحـل القضيـه *** وانت من ناسٍ تعتق ارقاب وتحل القضايـا

قلت تدرين انتهى الموضوع( وينش يابنيـه) *** كن خليها كتبت الشيـن فـي كـل الزوايـا

[عزي لحالي]

قصيدة العزوه



يقول من عاف خلانه ومجلاسه=من هول شيٍ حداه وكدر نعاسه

مجنون خلقه وجاني واحدٍ جني= احس كنه سقاني شي في كاسه

يحدني لين اوقف له واغني له= واطب وسط البحر وا جيب لي ماسه

اعرف متى اجيبها صلفه ومجنونه= واعرف متى اجيبها ترفه وحساسه

راهي وحذفي بعيد وشاعرٍ مبدع= الفكر مثل القلم والقلب كرّاسه

اعد نفسي سواة الزير في تغلب= لاصار ضرب القنا والدرع والطاسه

في ساعة الضيق مانيب اعرف الذله= يامرحبا بالخطر لادقــّت اجراسه

لاقلت انا اخو نوير مكبر العزوه = حتى نوير سنافيه ومدباسه

نادوا فهد لايجيني واحدٍ غيره= اللي لاجات الشدايد مانثنى باسه

ياعزوتي في نهارٍ اشعثٍ اغبر= يشرب به الدم شرب الماء في طاسه

تقدِم وانا اقدم ليامن ثارت الهيجا= صوت البنادق نغم والموت مرواسه

الكل منّا صميدع راس ومشورب = مثل البحر والبحر من يعرف اقياسه

مادام حنا عيال جخير ابن نادر= حنا حزامه وخدامه وحراسه

انا بااوصي ورد العلم لخواني= حقٍ علينا نصير اقرب من انفاسه

عودٍ رقا بالمراجل عالي القمه= لاغاب نبراس غيره شفت نبراسه

يشهد له اقصى العرب بالعز والهيبه= ويشهد له اقرب قريب وربعه وناسه

والبن والهيل وجروم الغضى تشهد= والنجر وايده وملقاطه ومحماسه

هذاك من هيبته حتى تحنحانه= يهاب منه الهوى لاهب نسناسه

اقسى من السيف والطف من هوى الغربي= لاقلت تكفا عطا لو تطلب الباسه

ابيه لامن دعا لبيه يسمعها = لبيه لامن سمعها تجلي اعماسه

وابيه لامن تكلم كلمته تسمع = وابيه قدره سما ماينحني راسه

وابيه لامن طلب له حاجةٍ يعطا= لاقال هدو جبل هدوه من ساسه

والله له الشكر والعرفان والمنه= والعبد لولا رجا الله يعلن افلاسه

اقولها عن قناعه وافتخر فيها = وقد قيل كلا ً على طبعه وهوجاسه

[عزي لحالي]

قصيدة قمة المجد


ياهيه انا في قمـة المجـد ياهيـه *** ماجات منّه ربـي اللـي عطانـي


قدري ليامن جيت اسميـه اسميـه *** اما الجـدي ولا سهيـل اليمانـي


الى شرهت اعرف حدود المشاريه *** مانيب اقـول انـا فـلان الفلانـي


احب راع الطيب واحـب طاريـه *** ياني احب اهل المواجيـب يانـي


رفيقي احترمـه واعـزه واداريـه *** والى نصانـي فالمواقـف لقانـي


لخطى علي ماقلت يخطي علي ليه مالي عيـون تشـوف ولا اذانـي


اما نتطحته وجـه مانيـب قافيـه *** واللي على قلبـي يقولـه لسانـي


وبرقٍ يلوح هنـاك ياعـز واليـه *** لو ماسقاني قلـت لـو ماسقانـي


اللي يخاويني على الطيب اخاويـه *** ماعـده الا واحـدٍ مـن اخوانـي


خطوى العريب اللي تشرف مماشيه *** نسل الرجـال معربيـن المجانـي


اللي ليا من الرجال اعتـزوا فيـه *** عبارته قمنا تـرى العمـر فانـي


لاهوب ناسينـي ولا نيـب ناسيـه *** ان غاب جيته وان تغيبـت جانـي


اللـي يلبيلـي وانـا اقـول لبيـه *** قدر وغلا ماهوب مقصـود ثانـي


والله لوقـف لـه (كذيـا) واحييـه *** بالدلـه ام الهيـل والزعفـرانـي


والا الردي لا راح مانيـب باكيـه *** ويا جعل ابيه النـار كانـه بكانـي

[عزي لحالي]

قصيدة كيد النسا


الله يصبرنـي ويدمـح زلتـي والله يعيـن *** وجهٍ من غبار السنين العوج والحزن اكتسا


ياوجد حالي من عنى قلبي ودورات السنين *** لاجيت بنسى ضيقةٍ فالصدر قلبـي مانسـى


ويامل قلبٍ له سنه مابين زين وبيـن شيـن *** اصبِح وانا طيّب واشوف الموت لاحل المسا


لي فكر متشتت ولي قلبٍ من اللوعه حزين *** كله من اسباب الجفا والبعد وجروح الأسـا


على الهنوف اللي غلاها بين قلب وبين عين *** اللي غلاها بان فعيوني وفـي قلبـي رسـا


اجي لها يومين واليوميـن كنهـا ساعتيـن *** واروح عنها والطواري بين عـل وياعسـا


وايدي على الجوال قبل يدق واسمع له رنين *** كني مواعد لي جموع شيوخ وجموع اريسا


ولا كلّمتني من حرارة صوتهـا اتـوه ليـن *** اروي ضما سمعي ويدفا السمع لامنه احتسا


والا طرت لي والهموم افواج جريت الونين *** والا تذكرت الطريق الصعب غنيت يخسـا


اشغّل الفكسار دون شعور ويحـذِف ميّتيـن *** ولا أحس إلا بدون شعور قد طفت الحسـا


لاتسألوني وين خلوني كذا مـن دون ويـن *** قلبي دليلي لو يطول الدرب ويطول القسـا


وان كان شفتوني حزين وحافظ السر الدفين *** خايف لجي منّي وكيفي علك فحلوق انجسا


به حاجتين الناس تكرها مع انهـا حاجتيـن *** الموت من ضيم الدهر والموت من كيد النسا

[عزي لحالي]

قصيدة شيخة بنات


يقول من يهوى ركوب المسرجـات *** لاجيب طـاري للسيـوف وسلّهـا

ياسامعـي والاولـه مـن الاولات *** تنبيك عـن باقـي علومـي كلهـا

ترى حلاة الشي لاجالـه طـرات *** واللي تجي في حلهـا فـي حلهـا

شبّـه وبـرّاد وثـلاث مهـيّـلات *** هاذيـك اركدهـا وذيـك ازلـهـا

فلة حجاج وطيب راس وطيب ذات *** ياقلـهـا فــي وقتـنـا ياقلـهـا

في ذمتـي ذمـه كـأن المفـردات *** تصيح باسمي يابـن عـارج سِلّهـا

والله لعديهـا حــدود النايـفـات *** مادمـت اميّـز دقهـا مـن جلهـا

والكلمه اللي جات مدري كيف جات *** زلّه وشرهتهـا علـى مـن زلّهـا

ياللي تقول النوم أخير من الصـلاة *** شوري عليك أد الفروض وصلهـا

يامل قلـبٍ بيـن ود وبيـن هـات *** والعين مـن كثـر السهـر ياملّهـا

لاجيت بانسى واعتبر مافات مـات *** استرجع افكـار الحـزن واحتلهـا

وابكي على الفرقا ولكن في سكات *** ماهوب شـرط ان الدمـوع أهلهـا

عليك يانبضـي ويـا سـر الحيـاة *** ياللـي غلاهـا عَزهـا مـا ذلهـا

شيخة بنات وعلّمـي كـل البنـات *** سبحـة غلانـا مانويـت أفلـهـا

مالك غنى عني وانا مالـي غنـات *** والحاقـده منهـم تمـوت بغلـهـا

ريقك عسل واساوره سكـر نبـات *** وشفـاك ماتبخـل عليـه بظلـهـا

انتي صفاتك غير عن كل الصفـات *** اضيـع فيهـا لابغـيـت ادلـهـا

لبّى البراقع والغطـاوي والعبـات *** يازيـن سكبتهـا ومصعـب شلهـا

عندي ثلاث اشياء في قلبـي ثبـات *** والله مااخليهـا لاقـالـو خلـهـا

شوفك وشوف الما وممشىً فالنبات *** لاخيرونـي قلـت أبيهـا كلـهـا

[عزي لحالي]

قصيدة السنافي والسنافيه


لاحـان بـدع القصيـد وحـان طاريّـه *** رفعـت صوتـي ولبـت لـي قوافـيّـه

والشاعـر اللـي سواتـي لابـدع قافـه *** يعيـش جــو الـرهـاوه والرفاهـيـه

اشعل فتيـل القصيـد ويحتـرق غيـري *** واجيبهـا مـن صميـم القلـب نـاريـه

صعبـه وطوعتهـا واصبحـت مالكهـا *** وعسفتهـا مـثـل عسـفـي للعمانـيـه

وسمتهـا وسـم ابـوي ووسـم جدانـي *** واسمـي علـى صدرهـا كنّـه مداليـه

اصيـر لعيونهـا مصـدوع ومشاكـس *** وتصيـر لجلـي صديعـه وانتحـاريـه

هذي طرات القصيد اللـي علـى حلـه *** يصبـح مثـل فـي قصايدنـا العموديـه

وبعض الشعر لـو تعـده فالسنـه مـره *** تلقـى كثيـر البشـر تحفـظ معانـيـه

وبعض الشعر شاعره مـن عـاده يعـده *** يقال ليتـه جلـس فـي صـدر راعيـه

وانا قصيدي ليـا مـن هاضنـي بدعـه *** امـا امـدح رجـال ولاّ ادلـع بنـيـه

ولا امدح الا عريب السـاس والمنسـب *** اللـي تسوقـه علـى العليـا هقـاويـه

خطوى العريب الصعيب الوافي النـادر *** اللـي فعولـه توافـق مـع عـزاويـه

راع الوفـا لاسألنـي ويــن تقـديـره *** ان كان ماهو هنـا فـي صـدري هنيّـه

وراع الردى لاتحاكـى قلـت لـه هيـن *** خسـارةٍ فيـه حتـى طــاق طاقـيـه

فـي مجلـس العـز لايقلـط ولا يذكـر *** فعل الردى فـي جبينـه صـار ماريـه

راع الـردى لاتحاكـى قلـت يانـابـج *** ولو تعكسون الحروف تصيـر عكسيـه

مـن واقـع التجربـه ومعابـل الدنـيـا *** صرت اعرف النـاس تركيبـه ونفسيـه

مؤمن بمبدى ليا منّك حضـرت اصهـل *** واموت فـي مخـذة الحاجـه ذراعيـه

وافخر بربعي ووقف مـع بنـي عمـي *** واشـوش لاصـارت الدعـوى جنوبيـه

مانيب عجمي ولكن لا انتخـى العجمـي *** اصيـر كنـي ولـد عجمـي وعجميـه

احيان اقول المراجل مـن ضنـى يامـي *** الاب يـامـي واكـيـد الام يـامـيـه

هذي طـرات العسـر يامـدور الهيـن *** تاتي كـذا مـن طناخـة راس وحميّـه

والرجل لاصار طيـب قلـب وسنافـي *** ودك ليـا مـن عشـق يعشـق سنافيـه

وان كان ماالله قسم باقـول لـه حاجـه *** احسن له يعيـش فـي جـو العزوبيـه

انا اعشـق الجـادل الرعبوبـه الترفـه *** جنّـي وقلبـي وقـع فـي حـب جنيـه

بنـت الكـرم والوفـا والعـز والنخـوه *** واخت السيوف الرهـاف وكـل جنبيـه

اسمـع بسيـد الخونـدا اللـي يطرونـه *** والبنت هـذي حسـب عرفـي خونديـه

تطري علي وان سهيت شوي وش يحصل *** القلـب كنـه يفرقـز مــن كراسـيـه

وتسري بدمـي وفـي حلـي وترحالـي *** تستوطـن الفكـر فالروحـه وفالجـيـه

وان عـودت للغـلا مكانـهـا ثـابـت *** تسكـن بقلبـي وترتـع فـي محانـيـه

ولا المزاييـن واجـد وانشـدو ا قلبـي *** يامكثـر اللـي بقلبـي شبـه طرقـيـه

والنـاس واجـد وكـلا ً دربـه يـدلـه *** والعمـر رحلـه وكـل النـاس عبريـه

تـدرون منهـي حبيبـة قلبـي الاولـى *** امـوت واحيـا وانـا احـب السعوديـه