رحلتي سفير آل عبهول مع زملائي

[سفير آل عبهول]

http://www.bebsi.com/vb/images/medals/rosette1.gif

بسم الله الرحمن الرحيم

السلام عليكم ورحمة الله وبركاته

في هذا الموضوع قمت بسرد قصة فيها من الواقع وفيها من الخيال الشيء الكثير ..

القصة تحكي مسيرة لرحلتي حول مملكتنا الغالية ، وما دار فيها من الاحداث والوقائع الشيء الكثير ، ومن المغامرات .. وكل ما هو ممتع ومفيد .

الرحلة تتكون من سواق الباص ، وأمير للرحلة , ومهندسين للسيارة إذا تعطلت لا سمح الله أو إذا اردنا ترهيم شيء فيها ، لنستفيد منه .
وتتكون من عدة مسؤلين مسؤل عن عزبة الطبخ ومسؤل عن المسابقات والتسلية ومسئول عن ... وعن ... وعن .. كل متطلبات السفر والرحلة .

وكذلك مسئول عن المسئولين لمراقبة اعمالهم وتصرفاتهم ، وعدة اشخاص لمساعدة ومعاونة الأمير وتسهيل وخدمة الزملاء الباقين الذي اشتركوا في هذه الرحلة .

سأبدأ في الرحلة ، وعسى ان تنال إعجابكم ......

[سفير آل عبهول]

شراء الباص ( 1 )



إخوتي الأعضاء :



السلام عليكم ورحمة الله وبركاته وبعد :



سأحكي لكم رحلتي أنا ومجموعة من الشباب للنزهة والفائدة حول مملكتنا الحبيبة ولنستكشف معالمها الرائعة



لكن قلنا لابد من شراء سيارة لنسير ونلف كل منطقه على راحتنا وتحت تصرفنا



وصاني احد الزملاء بشراء صالون ملكي آخر مؤديل 2008 من عند صاحب معرض يعرفه زين ، وعنده صوالين GMC من النوع الفخم .. لكني قلت ما يصلح صالون ! لازم نأخذ لنا باص كبير مثل حقات النقل الجماعي أفضل لنا واكبر ، وانت خابر كل ما كثرنا احسن واقوى ، يعني حنا منب ماخذين شقه مفروشة ؛ نبي ننام في البر وتخبر البر يبغى له جمعة وعزوة ...


قال اللي تشوفه يا ابوعبيد



اتصلت بصاحب المعرض : السلام عليكم


رد : وعليكم السلام


أنا : كيف الحال والأحوال


رد : بخير وعافية والحمد لله


أنا : صاحب معرض السيارات الفلاني ؟


رد : إيه الله الله .. آمر تدلل


أنا : الله يرضى عليك ودي تجي عندي في البيت ، وأتفاهم وإياك ابي سيارة خاصة بسافر عليها مع ربعي .


( وبما إني هامور جاني في بيتي جزاه الله خير )



بعد صلاة المغرب وإذا بجرس الباب يرن ، من بالباب ؟ قال : أنا صاحب المعرض . قلت : تفضل الله يحييك وأبركها من ساعة نشوفك



كان عندي في البيت زميل صاحب المعرض وواحد الزملاء اللي بيكشت معنا ، وهو حريص جداً لقيادة الباص . بس مهوب على كيفة ؟ وأنا وين اروح ؟



جلسنا وتقهوينا واتفقنا على الباص الطيب من نوع مرسيدس ، وقال : مايكون خاطركم إلا طيب وكلها كم يوم والسيارة جاهزة ، وابكشت معكم وابصير مسؤل عن أدوات السلامة مثل الاستبنة والمفكات والعفريته ، وعندي خبرة في الميكانيكا لو حصل شيء لا سمح الله .



قلنا : بيض الله وجهك وكثر خيرك والله يحييك في سفرتنا هالطويلة لكن عساك عندك إجازة طويلة ؟ قال : أبشرك الأمور زينة . قلت : الحمد لله .



بعد كم يوم اتصل علي وقال السيارة جاهزة وتعال استلمها .



طرت من الفرحة ورحت أنا وزملاي الأثنين إلى المعرض وشفنا السيارة وأخذناه والحمد لله بيدنا نركب فيها توانك وسلة عشان يأخذ العفش ونرتب الأمور .



بعدها أعلنا عند زملائنا بأننا شرينا باص لقضاء رحلة ممتعة حول بلادنا الحبيبة فسارعوا بالحجز والتسجيل معنا جزاهم الله خير .

[العبهول التميمي]

وشلون خياليه من راسك .

ولا تبي تنفذها .

[سفير آل عبهول]

العبهول التميمي

مشكور على المرور ، والقصة طويلة وقد تكون أنت من اعضائها

[ابو عدي]

سفسف وش السالفه وش ذا الرحله المفاجئه اهم شي خلك متواصل معنا في المنتدى

[سفير آل عبهول]

ابو جوري

ابشر انا معكم وان مسافر لا تخاف ، ولن انقطع إلا أن يشااااااااء الله

[عبيد الشيخ]

خلني عند السواق علشان اشوف زززززززين واخم السواق مخمس على راسه اذا نام.......

[سفير آل عبهول]

ديرتي / ابشر بعزك ويمكن نحطك سواااااق بدل السواق الحالي

[عبيد الشيخ]

ماودي أسوق ........ابي عند السواق والا أدور باص غيركم ........

[سفير آل عبهول]

ديرتي :

ابشر بعزك ، اللي تبي


بدأ التسجيل ( 2 )


بدا كل واحد يقول : تكفون لا تخلوني ؛ بروح معكم عشان منكم نستفيد ونفيد ..


لما علم الكثير بهذه الرحلة ، جتني اتصالات عديدة تبارك لي بهذا الحافلة الرائعة والرسمية ( خاصة إن خوينا راعي المعرض جايبها من ألمانيا مباشرة ) .

وكنا قد استأجرنا قبلها باص صغير لرحلة قريبة لكن للأسف جاء واحد وصدمه – الله يهاديه – وراح الموتر تشليح .



من الاتصالات اللي جتنا ، واحد من الغالين من أهل تمير .. شكرنا وبارك لنا بالحافلة وقال سجلوني واحجز المرتبة الأمامية ،، يعني جنب أمير رحلتكم .. وأنا جاهز وقطتي جاهزة وكل ما عندي تستاهلونه ..



ابشر بالمقعد الأمامي جنب الأمير ... وإن شاء الله إنك قد هالمكان .. وإلا رجعناك وراء مع المفارش ( قلتها مازحاً ) .



طبعاً وقفنا الباص على الطريق العام في تمير عشان كلٍ يشوفه ...



وفي يوم من الأياااام شافه واحد من الجماعة وأعجبه الباص واطلع على سير الرحلة ، واتصل علي هو الآخر ، وقام يستهبل علي ( لاني أنا غلطان يوم إني كاتب رقم جوالي على الباص ، وهذا فاضي قاعد يستهبل ، ويسحب ، لكن وش أسوي هذا الحل عشان الكل يحجز معنا ) قال : تراني أمزح معك أنا فلااااان بن فلاااااان ، صاحب البااااص المشهور ( اكشت في البراري والبحار ... واستمتع بالمغامرات والأفكار ) وقال سجلوني بسرررررررعة ، وعندي لكم أفكار تخلي الرحلة ممتعة أكثر وأكثر وعندي برامج وأمور كثيرة ما تعرفونها ، كذلك عندي بخص شوي في الميكانيكا .. ( وش السالفة الأول ميكانيكي والثاني ميكانكي ؟ !! ) .. قلت : حيااااك ربي ؛ وتصلح اجل مع الميكانيكي الأول تشاورون وتساعدون لو صار شيء لا سمح الله ... قااااااال : ابشروا بعزكم ، وارسل - جزاه الله خير - رسايل خاصة لكل ربعة اللي يعرفهم وقال : تعالوا سجلوا .. لا تفوتكم الرحلة الخيالية .

( ترقبوا للحلقة الثالثة )

[عبدالعزيز الفيصل]

شـكــ وبارك الله فيك ـــرا لك ... لك مني أجمل تحية .

[عبدالعزيز الفيصل]

ننتظر الجزء الثالث يا سفير

مشتااااقين

[ابو عدي]

السفير انا معك ولا احذف ردي

[عبيد الشيخ]

متى نحرك مليت وانا في في هالباص ,,,,,,,,,,,

[ابو عدي]

سفسف والله انك بارد الاجازه تبي تنتهي وحنا واقفين في تمير

[سفير آل عبهول]

الاخوان

عبدالعزيز

ديرتي

ابو جوري

ابشروا الجزء الثالث جاي في الطريق ، وإن شاء الله تكونون من أهل الرحلة ومن المتميزين فيها .

ولا تستعجلون ،،،، الأحداث واااجد

[NO.2200]

انا معكم بس ابالحقكم على الددسن حقي عشان العفش والعزبة بس ابي خوي على الباب

[أبو تميم المفرج]

فيه مكان اجي معكم

[ابو عدي]

2200 انا معك فكني من الباص يروع وياكثر حوادثه وابشر بالببسي والبساكيت عند كل بقاله

[أمير الحوطة]

http://www.al-molatham.net/p2/w/29.gif
اسرع يا سفيرنا ترى الباص ماهو مكيف والحر واصلنا !!!!!!!!!!

[أبو تميم المفرج]

والله ماظنتي هالتمارى بيطولون راكبين الباص

شكل كل واحد بيجي بموتره

[ابو عدي]

انا هونت مانيب رايح قصرت مامشينا

[محـ الديار ـب]

يالربع يالربع انا ابي اروح معكم حطوني في السله فوق

اهم شي اروح مع الجماعة

[بنت الأمل]

ههههههههههههه
الربع متحمسين ومتلهفين على الرحلة .. شوي شوي أرفقوا على أعماركم ..
الا على الطاري ماتبون لكم شغالات تنظف لكم الباص وطباخااااااااااااااات ؟؟
ترى بنات عبهول مايقصرن ...

[NO.2200]

2200 انا معك فكني من الباص يروع وياكثر حوادثه وابشر بالببسي والبساكيت عند كل بقاله


خلاص بس علم اهلك والوعد التقاطع

[فارس نت]

نبي نسجل معكم في الرحله احجز لنا موقع في الباص ..
وابشرو بالطبخ والشاااهي والقهوه على لايهمكم ...

[سفير آل عبهول]

يا شباب لا تستعجلون

واركدوا الباص بدأ يمشي
وإلا يلحقنا بموتره مانبيه ترى بلف عليه واصدمه ههههههههه

وبالنسبة للشاهي في خدم وحشم
وبالبنات لهن سالفه بتجي في نص القصة
انتظروا الحلقة الجاية

[صـقـرأمـه]

تراني زميلك و ولد عمك يا سفيرنا
فيه مكان لي؟

ولا مشيتو؟؟

[NO.2200]

وش تصدم انت وتبيسك !!!
والله لو تصدم الددسن ان ما يفكك مني والا ابو جلمبو ..
اقول رح قدام وانا وراك .. والددسن له سالفة بعد ..قبل نهاية القصة .. يبي يفككم من ازمة ..

ابو جوري.. وينك اركب ولا عليك منهم

[العبهول التميمي]

انتبهوا لإستبنت الباص تراها منبنشرة .

[OMوقت اللزووومZO]

افا تاتروحون مالنا مركب

[سفير آل عبهول]

الحلقة الثالثة (( قصة الثلاثة ... ))


واجتمع الشباب من كل مكان .. وكل أخذ ورقه وسجل بياناته ، وبيني وبينكم أزعجوني ربعي ، وكلً يقول خل نمشي لكن صدق اللي قال : " ياشين عجلتكم يا هل تمير ، كنكم أهل الجنوب "



قلت اجل تدري نمشي هالحين ومسموح التسجيل والركوب لو في مفرق عشيرة أو المجمعة أو أي مكان ... يعني إذا شفت الباص موقف تعال وركب واحمد ربك على العافية .


مشى الباص ولله الحمد وأنا ماسك الطارة .. ويا ساتر استر .



لما علم بعض الناس بإنطلاق باصنا ؛ لحقنا على موتره وقام – الله يهاديه – يحد الباص ويجي قدامه ...



طااااط


طااااااط



وخر لا نصدمك يا هوووووو



وإلا ذاك الهايلكس موديلة 82 جاي مسرع ومسوي فتوه إلا وأنا أحده ، ويربط فرامل لكن ستر الله علينا وعليه وراح والحمد لله افتكينا منه ..



بعض الشباب يقول باصكم كله كرتون ياسرع ما يتفكك . قلت والله ماتدري هذا غير الباصات المألوفة يعني فحط تلقى زيه .


......



لما وصلنا كبري عشيرة مرينا المحطة لأني نسيت أعبي من عند محطة الملتقى فقلت أعبي من محطة عشيرة ، ولما وقفنا فيها جاء وركب معنا ثلاثة أشخاص متلثمين ! قلنا لهم : من أنتم ؟ لكن للأسف لم نجد إجابة واضحة واكتفوا بقول : نبي نروح معكم وبس .


ونحن من طبعنا الكرم والطيبة قلنا حياكم الله وبياكم والمعرفة بعدين يا اخوان .


سرنا مع الخط السريع بإتجاه القصيم وسرنا ثم سرنا وسرنا ...



الإخوة في الباص بدوا في التحدث مع بعضهم البعض وخذ من هالسواليف ،، وكلٍ يجيب له موضوع وينقلون أخبار بعضهم لبعض .




الإخوة الثالثة اللي ركبوا معنا عند كبري عشيرة ، صارت بينهم خلافات ، وبدأ كل واحد منهم يعاند الثاني .. !! وش السالفة ؟ حنا ماندري !


ما درى أمير الرحلة إلا واحد من الشباب يناديه ويقول تعال شف وش صاير في الخلف ، مغير هواش وكلٍ يكذب الثاني ، جاء الأمير مسرع وأصلح بينهم وقال : اذكروا الله ولا تهاوشون مرة ثانية .


التزم الجميع الصمت ، لكن الإخوة الثلاثة عندهم علم .. وأنا شاك لكن وش أقول الشكوى لله .


لما وصلنا كبري الروضة وإذ بواحد من هالثلاثة يجي لي ويشتكي ويقول فكني من هذولاء .. تراهم يقولون ويقولون .. ( من هالكلام الفاضي )


جلسته عندي وقلت اذكر الله وخل عنك شغل المبزرة


سحب نفسه من عندي وراح يتشاتم مع أحد الأخوة اللي ماله دخل في السالفة



فيه شباب معنا تفرك قلوبهم على هذولا المشاغبين لكن وش يسوون مالهم سلطة ، وخاف يقولون شيء ويعاقبون لا قدر الله .



قرب من عندي الأمير وقال لابد نحط عيون في الخلف يتابعون هالعالم اللي مدري وش تبي . قلت : اللي تشوفه وأنت الأمير



وقع الاختيار على اثنين من الشباب وراحوا وراء وصاروا يتابعون أي واحد يشاغب ويساعدوننا في تنظيم الباص .



مشكلة باصنا يالله يمشي يعني 20 إلى 30 كم في الساعة , وبطيء لكنه ممتع إلى درجة كبيرة .



لما وصلنا كبري جلاجل إلا والشباب الثلاثة يسون ضجة مرة أخرى ..


فغضب أميرنا غضباً شديد . وقال : والله ....

" التكملة في الحلقة الرابعة "

[ابو عدي]

مازلنا ننتظر القصه ياسفيرنا

[صـقـرأمـه]

يلة تحمسنااااا

[عبيد الشيخ]

ماشاء الله على راي الامير على فكرة العيون ..هالعيون نرجوا منها اخبارنا بما رأت....

[سفير آل عبهول]

ابو جوري
صقر امه

مشكورين وابشروا القصة طويلة


ديرتي

خل عنك اللقافه ولا تسوي شيء مرة ثانية هههههههههه

ومشكور على التعديل الإملائي هههههههه

[×البرنس×]

اسمحلي بدخل معكم في الموضوع

الحين القصة حقيقية والا خيال على قول العبهول التميمي

[فهد الفيصل]

وش فيكم ياشباب ..
اكيد خياليه !!
المهم سفير ابي اكون موجود ..
مايير تحركون وتوصولون مفرقنا وماتعطونا خبر وانت خابر انا مااطلع الشارع عشان اشوف الباص موقف يعني
ضروري تكون اتصلت ..
يالله تراي جاي بالطريق انتظروني ..

[سفير آل عبهول]

لا تخافون أنا ما نسيتكم

اي واحد يرد على موضوعي يعتبر إنه معنا في البااااص ... وش تبون أكثر من كذا !!!

وحياكم الله معنا في هالرحلة السعيدة

[سفير آل عبهول]

الحلقة الرابعة : ( ما عرفنا بعض )



فغضب أميرنا غضباً شديد . وقال : والله ....


إن ما شفت لهم صرفة يا السفير أنت وهالمهندسين الأثنين النايمين إن يجيكم شيء ما شفتوه



قلت : ابشر طال عمرك ، قام المهندس الأول وقال لي : وقف على جنب يالسفير وافتح الباب .


وقفت وفتحت الباب ! ثم بشوتت رجل من المهندس1 إلا والشباب الثلاثة خارج الباص .



قال المهندس 1 :


امسك الخط وانتبه لهذه الأشكال ، لانها قد ترجع مرة ثانية وحنا ما ندري .



قال المهندس 2 :


أنا أقترح عليكم إن أي واحد يبغى يركب معنا إنكم تعرفون اسمه ومنهو قبل لا يركب ، وتخلون هذا شرط أساسي لركوب الباص



الرأي ممتاز وأنا أؤيد رأيه ، لكن فيه بعض الشباب معنا في الباص ما وثق من نفسه ( للأسف ) ويقول لا احد يدري عني ، أنا أشتري مخاواتكم ولهوب لازم تعرفوني ..


حتى إن بعضهم اختار اسم مستعار لنفسه !! ليش ؟؟


مايبي احد يعرفه



معقولة يا جماعة ،، جماعة في باص واحد وكلٍ يخبي اسمه عن الثاني !!


هل هذا يعقل


لو فيه ثلاث اشخاص رايحين لمكة وفي سيارة وحده ولا احد يبغى يعرف الثاني ، تتوقعون هل بيرتاحون مع بعض ؟


تتوقعون هل بيصلون ويقطعون الخط بسرعة ؟


أكيد كلٍ بيمل وبيتعب ويمكن ينزل من السيارة من المملل والطفش .



مثلنا في هالباص لازم نعرف بعض ، وش الفايدة ! ؟ إذا كل واحد يتكملم ويسولف وحنا ماندري منهو .


كذلك اكد لنا خوي الامير ان معرفة أسمائهم لا بد منه وإلا وش الفايدة .



طرحنا رأي المهندس2 على الأخوة في الباص لكن للأسف ما احد يبغى هالطريقة .


.........



قلنا نمشي ويكون خير بإذن الله ، ولعل الله يهديهم ونعرف بعض بعدين .



مشينا حتى وصلنا الغاط ووقفنا في بقالة المحطة لنشترى بعض ما يمتعنا في هالخط الطويل والرحلة الطويلة



تذكرون في أول حديثنا ، كان المهندس الثاني يقول إني بسوي برامج وأشياء تسليكم !



كنا ننتظر ذلك بقوة لكن خوينا شدته مناظر البراري والأجواء الرائعة اللي حولنا وسحب علينا الله يهاديه



انطلقنا من المحطة ومشينا حتى صارت نفود الثويرات على اليمين وعلى اليسار ، بيني وبينكم أنا احب شي اسمه طعوس ...



ما علينا منه ، المهم قلت يا شباب وش رايكم نوقف نأخذ بيالة شاهي على الطعس ؟؟ .. مالقيت اجابة والكل ساكت ! عسى ماشر ؟ أو - السكوت علامة الرضا-



وانا دايم وشعاري في هذه الرحلة بالذات ، مأخذ بقوله تعالى : "وأمرهم شورى بينهم "




قال لي احد الأخوة ما عليك إن شاورتهم ما سويتا شي ، توكل على الله ووقف انا مشتاق بيالة شاهي تصك الراس .



قلت : ابشر وانا السفير لك من يوقف في اعلى طعس ويصلح لك شاهي على كيفك .



دورت لي مخرج وخرجت إلى النفود ، ونزل 8 من الشباب ينسمون الكفرات ، تخبرون كفرات الباص ثمانية 2 قدام و6 وراء .


نزلت واتجهت إلى الطعس ووقفت في اعلى مكان لنرى الزلفي والغاط من بعيد في جو عليل ورهيب .

[سعد الفيصل]

ما زلنا يا السفير متابعين

ياليتك تعجل علينا تحمسنا مع القصة وانا فهمت وش تقصد بها عجل علينا الأحداث حلوة

[ملكة العبهول]

مشكور يعطيك العافيه سلمت يداك على الموضوع الرئع

[ولد آل عبهول]

اقول يا السفير وشلون ما اخبرتني بهذه الرحلة اكيد خلاص ما تبينى اروح معكم في رحالاتكم يبدو أنه خاصة عموماً باسبقكم بموتري واسويلكم القهوه والغدى والشاهي بعد الغداء بحكم أن معي العزبه والعدة وبخلي ليلكم نهار باللبات وش رايك تعمدني ولا لا ترى الزباين واجد اللي شريت الباص منه يبي فلوسه .

[راعي الديرة]

ولد آل عبهول انا بخاويك اذا بغيت تروح علمني راح التوبيس وانا ما دريت

[الخيال]

ولواباخاويكم يالربع احتروني

[عبيد الشيخ]

وينك يالسفير .....................اكمل لافض فوك

[محـ الديار ـب]

ومازلنا في الانتظار

[سفير آل عبهول]

الحلقة الخامسة ( المهندس 2 )



قام مجموعة من الشباب الشقردية بالتكفل بكل شي ، فهذا راح يجمع حطب والثاني يعبي الدلة والبرقات والحمد لله الأمور زينة



جلسنا حول النار وبدأنا في السواليف والتعارف بيننا وكلٍ يدلو بدلوه ، وأمير الرحلة يسولف علينا من سواليف الماضي ويتحدث عن الأمور التاريخية التي استفدنا منها بشكل لا تتصوره أخي القارئ



مهندس 2 ،،، رأى باص غير باصنا في الجهة الخلفية من الطعس ، يعني ونحن جالسون لا نرها . وقام إليه مسرعاً ...



الأمير : يا مهندس 2 وين رايح ؟


المهندس 2 : أبد طال عمرك شوي وجاي ، أنا معكم لا تخافون منيب رايح بعيد بس بسلم على ربع لي هنا وكأني عرفتهم .


الأمير : الله يحفظك ، بس لا تتأخر .



ذهب المهندس2 إلى الباص ولما أقبل عليهم وإذا به يعرفهم جميعاً ، وهم من الأصحاب الأعزاء على قلبه لكنهم ليسو من جماعته (( مثلنا ))


ذهب إليهم وياليته لم يذهب ،، فقد رأى تلفزيون عندهم وطارت عيونه مع قناة دايم يفكر إنه يتابعها ،، وهاهو الآن يتابع القناة بكل شوق .



شربنا الشاهي ثم عزمنا على الممشى


أنا : يااااااااا مهندس2 يالله ترى حنا مشينا


المهندس كأنه ما سمع ، ومن حقه شاف شي طير عيونه ( لايروح تفكيركم بعيد )


شغلنا الباص ومشينا والمهندس2 قد فقدناه ولم يلقى لنا بال أصلاً


كيف راحت تلك الوعود بالبرامج والألعاب وما يجذب الجمهور ؟


للأسف .. ما شفنا منه شي حتى الآن



قال الأمير : معليش معنا مهندس1 ومعي واحد جالس قدام يسولف ويدقق جزاه الله خير والأمور ماشيه تمام والله الحمد .



الحمد لله على كل حال



( المهم ) سرنا بحافلتنا وباصنا العجيب بإتجاه القصيم وممرنا بتفتيش أم سدرة وياشين ذاك التفتيش واللي فيه معقدين بشكل غير طبيعي الله يهاديهم ، لكن الحمد لله ما قالوا شي ،،، لا ورازين جيب الشاص حق امن الطرق بجنوط مريسدس ( وحركات يا اهل القصيم حتى جيب الدولة ما خليتوه في حاله )



تعدينا التفتيش لننتظر الفاجعة الأخرى التي لم نحسب لها حساب



( التكملة في الحلقة القادمة )

[عبيد الشيخ]

هالحلقة ............قصيرة يابن العم .............لكن المهندس 2 خليتوة وبس !!!!!!!

[ابو عدي]

الله يستر لايخلينا المهند الاول عاد وش الحل

[سعد الفيصل]

ديرتي

المهندس2

هو اللي خلانا مهوب حنا اللي خليناه ،، لكن أتوقع إنه يرجع
تابع احداث القصة


أبو جوري

الله يستر

[محـ الديار ـب]

لا والله اللي دوبرت الامور نقصنا واحد
اهم شي المعزز اللي جنبك يابن العم لا يروح هو اهم شي عندنا

[سفير آل عبهول]

هههههههههههههههه

وش هالورطة يا سعيد

كتبت الرد بإسمك ،،

شفه لا يفوتك

[الخيال]

يالربع نبي ناخد الدبيحه من القصيم ولاتنسوني تراني احتريكم

[عبدالعزيز الفيصل]

ننتظر يالسفير الباقي